كيفية استخراج تصريح تصطاد بيه من أي مكان في مصر
::::::::::::::::::::::::::::::::::::::::::::::::::
في الموضوع ده أنا هحاول على قد ماأقدر اوضح كل حاجة في الموضوع ده من خلال تجربة شخصية في الموضوع ده .. والله المستعان .. نبدأ بقى
1. اولا علشان تطلع تصريح مبيت في أي حتة على الحدود (بحر أحمر, بحر متوسط ,...) لازم الأول تطلع رخصة صيد ودي بقى بـتطلعها من "الهيئة العامة لتنميه الثروة السمكية" ودي محتاجة
"2 صورة شخصية + 1 صورة بطاقة شخصية " وبردو لو إنت عاوز تطلعها لحد ممكن تاخد منه نفس الحاجات وتطلع ليك وليه (أنا جربتها ليها ول واحد قريبي وماكانش فيه أي مشاكل)
ومكان الهيئة دي هو:
- ميدان الجيزة .. بص فوق كده هتلاقي اعلان من اللي بيتعلق فوق العمارة ده .. هتلاقي واحد مكتوب عليه مصر للتأمين هيه دي العمارة بقى .. تخش جوه تركب الاسانسير الدور الرابع ...
-استخراج الرخصة هياخد حوالي من 10 إلى 15 دقيقة .. والتكلفة حوالي 30 جنيه (هيه تقريبا 28 جنيه أو حاجة زي كده )
- الرخصة دي مدتها سنة واحدة .. يعني بعد سنة لازم تجديدها ودي بـتتديلك الحق إنك تصطاد في النيل من فوق الكبري وكده ...
2. كده إنت معاك الرخصة .. عاوز بقى تطلع التصريح "تصريح حرس الحدود " وده بيطلع من حتة اسمها "قيادة قوات حرس الحدود - مجمع الخدمات" وده بقى موجود في فرع من شارع الطيران (أنا بـصراحة مش فاكر العنوان بالضبط) بس أنا فاكر إنه بعد فندق سونستا اللي موجود في شارع الطيران من ناحية صلاح سالم ..
يعني إنت هتخش شارع الطيران من صلاح سالم وهتلاقي فندق سونستا على يمين وبعده مصلحة الجمارك هتكمل برده على طول تقريبا هتخش بعد كده تاني يمين (أنا مميز اليمين ده بعمارة كده عليها 2 اريال كبير أوي تقريبا انتنا بتاعت ارسال ولا حاجة إنت بقى الناصية دي) هتخش فيه تكمل لحد آخر الشارع وبعد كده شمال في شمال هتلاقي مركز حرس الحدود ده إن شاء الله .. حمد لله على السلامة
- إنت محتاج (صورة البطاقة الشخصية + صورة الرخصة (رخصة الصيد اللي طلعتها من ميدان الجيزة ) + اصل الرخصة علشان يتأكد إنك مش ضاربها )
- التصريح بيخد حوالي من 10 الي 15 دقيقة برده .. وبيبقى صالح لمده 3 شهور بس (ممكن ناس تقولك طلع 4 تصريح كل واحد بـ 3 شهور يبقى كده معاك سنة .. أنا هاقولك لأ متعملش كده علشان ده مش ينفع دلوقتي أنا حاولت أعمل كده اللي لأ ماينفعش .. مش ينفع يطلعلك أكتر من تصريح واحد بـعد 3 شهور بس يعني ) ..
- التصريح بيسمحلك إنك تصطاد في أي حتة من السويس لحد شلاتين ومن اسكندرية لحد مطروح ومن راس السدر لحد شرم الشيخ يعني كل اللي تحلم بيه ...
- تكلفه التصريح ده 4 جنيه بس ...
منقوول
